ЕЛЕКТРОНСКИ СЛУЖБЕН ГЛАСНИК НА ГРАД СКОПЈЕ

Година: 2002 Број: 11
Датум на издавање: 10/23/2002
Општина: Совет на Град Скопје
Тип:Одлука

Наслов: Одлука за начинот и постапката за одржување на јавната чистота, собирање и транспортирање на комуналниот цврст и технолошки отпад на подрачјето на Град Скопје (Пречистен текст)
Текст:Врз основа на член 127 од Деловникот на Советот на Град Скопје и член 5 од Одлуката за изменување и дополнување на Одлуката за начинот и постапката за одржување на јавната чистота, собирање и транспортирање на комуналниот цврст и технолошки отпад на подрачјето на Град Скопје ("Службен гласник на Град Скопје" број 16/01), Комисијата за прописи на Советот на Град Скопје на седницата одржана на 14 октомври 2002 година го утврди пречистениот текст на Одлуката за начинот и постапката за одржување на јавната чистота, собирање и транспортирање на комуналниот цврст и технолошки отпад на подрачјето на Град Скопје.

Пречистениот текст ги опфаќа Одлуката за начинот и постапката за одржување на јавната чистота, собирање и транспортирање на комуналниот цврст и технолошки отпад на подрачјето на Град Скопје ("Службен гласник на Град Скопје" број 18/98) и Одлуката за изменување и дополнување на Одлуката за начинот и постапката за одржување на јавната чистота, собирање и транспортирање на комуналниот цврст и технолошки одпад на подрачјето на Град Скопје ("Службен гласник на Град Скопје" број 16/01) во кои е означено времето на нивното влегување во сила.


Број 09-2625/1 КОМИСИЈА ЗА ПРОПИСИ
14 октомври 2002 година ПРЕТСЕДАТЕЛ,
С к о п ј е Бранко Кузманоски


О Д Л У К А
за начинот и постапката за одржување на јавната чистота, собирање и транспортирање на комуналниот цврст и технолошки отпад на подрачјето на Град Скопје (Пречистен текст)

I. ОПШТИ ОДРЕДБИ
Член 1

Со оваа одлука се уредува начинот и постапката на вршењето на работите во врска со одржувањето на јавната чистота на јавните и сообраќајни површини, собирањето и транспортирањето на комуналниот цврст и технолошки отпад на подрачјето на град Скопје утврдено со Генералниот урбанистички план на Град Скопје, обврските на давателите и корисниците на услугите и распределбата на средствата по намени.

Член 2

Одржувањето на јавната чистота на јавните сообраќајни површини, собирањето и транспортирањето на комуналниот цврст и технолошки отпад како и чистењето на снегот во зимски услови се дејности од јавен интерес и се вршат од страна на јавни претпријатија основани од Градот Скопје, како и други правни и физички лица, врз основа на дозвола од Градоначалникот на Град Скопје.


II. ОДРЖУВАЊЕ НА ЈАВНАТА ЧИСТОТА

1. Јавна чистота
Член 3

Одржување на јавната чистота на подрачјето на град Скопје во смисла на оваа одлука е чистење, метење и миење на јавните и сообраќајни површини (отстранување на кал и прав, собирање и отстранување на отпадоци, миење на клупи, празнење и чистење на корпите за отпадоци поставени на јавните површини и отстранување на пцовисани животни), како и чистење на снегот.
Член 4

Одржувањето на јавната чистота давателот на услугата го врши со редовно метење и миење.

Метењето на јавните и сообраќајни површини се врши согласно годишната програма од член 6 од оваа одлука.
Член 5

Миењето на јавните и сообраќајни површини се врши согласно годишната програма од член 6 од оваа одлука.

Миењето на јавните и сообраќајни површини се врши по правило од 22 до 05 часот.

Во периодот од 15 ноември до 31 март (зимски период), миењето на јавните и сообраќајни површини може да се врши доколку температурата е повисока од 4 степени целзиусови.
Член 6

Одржувањето на јавната чистота на јавни и сообраќајни површини се врши врз основа на годишна програма во која се содржани динамиката, обемот, начинот и технологијата на вршењето на работите, поединечни и вкупни вредности, износ на средства програмирани за извршување на предвидените работи.

Програмата од претходниот став ја донесува Советот на Град Скопје најдоцна до 15 декември во тековната за наредната година.
Член 7

По исклучок, во случај на прекумерно загадување на јавните и сообраќајни површини поради временски непогоди, поголеми реконструкции и сл., надлежниот градски орган може да определи чистење надвор од динамиката утврдена во годишната програма за јавна чистота.
Член 8

Согласно годишната програма за јавната чистота, Градот набавува потребен број на корпи за отпадоци што давателот на услугата ги поставува на јавните и сообраќајни површини, ги одржува и редовно ги испразнува и дезинфицира.
Член 9

Изведувачот на градежни работи е должен да се грижи за:
- чистење на отпадот од јавните сообраќајни површини околу градилиштето што го создал изведувачот;
- натопување на растреситиот материјал при рушење и транспорт;
- одржување на чистотата на сливници и шахти во непосредна близина на градилиштето;
- чистење на коловозот и други околни површини од кал;
- чистење на тркалата на возилата при излегување од градилиштето и чистење на коловозот и други површини од кал;
- чистење на површината на градилиштето од отпадоци и шут, пред отстранување на заштитната ограда и доведување на оштетените јавни и сообраќајни површини во првобитна состојба.
Член 10

Не е дозволено растурање на рекламни листови, објави и слично лепење на плакати и други објави на комунални објекти, уреди и опрема поставени на јавни и сообраќајни површини, без согласност на надлежниот градски орган.

Согласноста од претходниот став се издава доколку барателот достави доказ за договорно чистење на јавните и сообраќајни површини од страна на давателот на услугата.

Член 11

Давателот на услугата е должен да се придржува до утврдената динамика, начин и технологија на одржување на јавната чистота.

2. Чистење на снегот
Член 12

Чистењето на снегот се врши согласно со одредбите на оваа одлука и според програмата на зимската служба на град Скопје.

Програмата од претходниот став на овој член ја донесува Советот на Град Скопје, најдоцна до 15 септември, за тековната зимска сезона.

Зимската служба на Град Скопје (во натамошниот текст зимска служба) ја реализира Програмата од став 1 на овој член.

Зимската служба ја организира надлежниот градски орган за комунални работи.
Член 13

Програмата на зимската служба содржи:

- организациона поставеност и обврски на Зимската служба и на другите учесници во извршувањето на работите сврзани со чистењето на снегот;
- обем, динамика и ниво на функционирање на Зимската служба;
- сообраќајници за приоритетно чистење на снегот и голомразицата и за посипување соодветен материјал, список на критични точки и витални објекти;
- број и вид на механички средства, нивната намена и распоред на користење;
- број и распоред на субјекти кои учествуваат во извршувањето на работите, сврзани со чистењето на снегот;
- обврски, услуги и средства на други учесници кои се вклучуваат во случај на потреба;
- локации определени за депонирање на снегот и нивно одржување и
- потребни финансиски средства за спроведување на програмата.

При изготвувањето на програмата на Зимската служба првенствено се земаат предвид сообраќајниците по кои се одвива јавниот градски превоз, каде што се наоѓаат здравствените и детски установи, училиштата, центрите за снабдување на граѓаните, како и можноста за изнесување на сметот од густо населените делови на Градот.

Член 14

Овластениот субјект што ги одржува и користи пазарите, е должен да се грижи за чистење и транспортирање на снегот од просторот на пазарите, како и од просторите што се во непосредна функционална врска со пазарот (простори околу пазарот, паркинг просторот и патеките за приод н а возилата за снабдување).
Член 15

Овласениот субјект за водовод и канализација е должен да ги оспособи сливниците и отворените улични шахти и да се грижи за нивно функционирање за време на топењето на снегот.

Овласениот субјект за одржување на чистотата се грижи за чистење на снегот од приодите до садовите за смет и од јавните пешачки површини што не се опфатени со чл.16 и 17 од оваа Одлука.

Овластениот субјект за градски и меѓуопштински превоз на патници е должен да го отстранува снегот од автобуските стојалишта за градски и меѓуопштински превоз и од автобуските свртувалишта.
Член 16

За чистење на снегот од тротоарите пред станбените објекти, за посипување на тротоарите со соодветен материјал во случај на голомразица, за чистењето на снегот од сопствените дворови, како и за чистење на снегот од покривите, ако тоа претставува опасност за минувачите или за самиот објект, се грижат сопствениците односно закупците на објектите.

Обврските од претходниот став траат непрекинато секој ден од 6,00 до 02,00 часот, за наредниот ден за време на зимски услови.
Член 17

За чистење на снегот од тротоарите пред деловните објекти, за посипување на тротоарите со соодветен материјал во случај на голомразица, за чистење на снегот од дворовите што припаѓаат на објектите, како и за чистењето на снегот од покривите, ако тоа претставува опасност за минувачите, се грижат претпријатијата, установите и другите правни и физички лица.

Ако во приземјето на станбена зграда има деловен простор, за чистењето на снегот од тротоарот пред просторот и за посипување на тротоарот со соодветен материјал, должен е да се грижи сопственикот, односно корисникот на деловниот простор.
Член 18

За чистење на снегот и посипување на тротоарот со соодветен материјал, пред објект во изградба, се грижи изведувачот на работите.
Член 19

Доколку субјектите од чл.14, 15, 16, 17 и 18 од оваа одлука не ги изршат своите обврски ниту во рокот што е определен во налогот на комуналниот инспектор, инспекторот ќе му наложи на овластениот субјект да ги изврши обврските на сметка на тие субјекти.
Член 20

Снегот од коловозите и тротоарите се собира на работ на тротоарот, а ако тротоарот е со ширина помала од 1,5 м. на работ од коловозот, при што се внимава да не се затрупаат сливниците и да не се наруши движењето на пешаците и возилата.


III. СОБИРАЊЕ И ТРАНСПОРТИРАЊЕ НА КОМУНАЛНИОТ ЦВРСТ И ТЕХНОЛОШКИ ОТПАД
Член 21

Собирањето и транспортирањето на комуналниот цврст и технолошки отпад на подрачјето на град Скопје се врши организирано и континуирано.
Член 22

Сопствениците, односно корисниците на станови и станбени објекти, на објекти на правни и физички лица за вршење на дејност, земјиштето што им припаѓа за употреба на тие објекти, како и на неизградено градежно земјиште, должни се на давателот на услугата да му достават точни податоци за површините што им се во сопственост или ги користат, како и за промените во поглед на површината, сопственоста или адресата.

Податоците од претходниот став на овој член се доставуваат заради утврдување на надоместокот што корисниците на услугите го плаќаат за собирање и транспортирање на комуналниот цврст и технолошки отпад.
Член 23

За настанатите промени од член 22 на оваа одлука, сопственикот, односно корисникот на површините, го известува давателот на услугата, во рок од 30 дена, од денот на настанатата промена.

Ако за промената во поглед на сопственоста не е известен давателот на услугата, надоместокот за собирање и транспортирање на комуналниот цврст и технолошки отпад го плаќа поранешниот сопственик.
Член 24

Корисниците на услугите должни се да го собираат комуналниот цврст отпад во пластични вреќи или кеси и го одлагаат во садовите за отпад.

Вреќите односно кесите во кои се собира комунален цврст отпад при изнесувањето мора да бидат цврсто врзани.

Не е дозволено сместување на комуналниот цврст отпад во оштетени вреќи и кеси.
Член 25

Технолошкиот отпад се собира во специјални садови за отпад, кои соодветствуваат на видот, својствата, количината и местото на настанувањето на отпадот.

Садовите од став 1 на овој член ги набавуваат корисниците на услугите од свои средства.

Член 26

Давателот на услугите од свои средства набавува потребен број на садови за сместување на комуналниот цврст и технолошки отпад, ги поставува и одржува.

Вреќите односно кесите за собирање на комуналниот цврст отпад ги набавуваат корисниците на услугите.
Член 27

Местото за поставување на садовите за сместување на комуналниот цврст и технолошки отпад го определува надлежниот градски орган во согласност со Главниот архитект на Град Скопје, според сообраќајно-урбанистички услови и нормативи.

Корисниците на услугите не смеат да ги оштетуваат садовите за отпад.
Член 28

Комуналниот цврст и технолошки отпад корисниците на услугите го изнесуваат и сместуваат во садовите за отпад од 7 до 10 часот и од 19 до 22 часот, ако отпадот се изнесува ноќе.
Член 29

Давателот на услугите комуналниот цврст и технолошки отпад по правило го собира и транспортира во текот на денот.

Од улиците во централното подрачје на градот Скопје, отпадот од претходниот став на овој член, давателот на услугите го собира и транспортира ноќе, во време од 22 до 07 часот.

Собирањето и транспортирањето на отпадот од став 2 на овој член во случај на ниски ноќни температури, давателот на услугите го врши и во текот на денот, по претходна согласност на надлежниот градски орган.

Улиците од став 2 на овој член ги определува надлежниот градски орган, согласно урбанистичкиот план.
Член 30

Давателот на услугата е должен комуналниот цврст и технолошки отпад да го собира и транспортира најмалку три пати неделно.

Во делови од подрачјето на Градот, каде што на возилата на давателот на услугата е отежнат пристапот, отпадот од претходниот став на овој член се изнесува најмалку два пати неделно.

Доколку во одделни подрачја на Градот возилата на давателот на услугата немаат пристап, надлежниот градски орган и давателот на услугата определуваат локации за одлагање на комуналниот цврст и технолошки отпад до неговото собирање и транспортирање, како и динамиката на собирањето.

Член 31

Давателот на услугата при собирањето и транспортирањето на комуналниот цврст и технолошки отпад е должен да води грижа отпадот да не се растура, да не се крева прав и да не се создава прекумерна бучава, да не се валкаат садовите за отпад, а по преземањето на отпадот садовите да се вратат на локацијата.
Член 32

Преработка или депонирање на комуналниот цврст и технолошки отпад што го создаваат корисниците на услугите, врши Санитарната депонија "Дрисла".

Член 33

Комуналниот цврст и технолошки отпад што со дополнителна доработка или преработка може корисно да се употреби (хартија, стакло, пластика, железо и др.), се собира во посебно обележани садови што ги набавува и поставува давателот на услугата.
Член 34

Собирањето и транспортирањето на комуналниот цврст и технолошки отпад, давателот на услугата го врши согласно годишната програма за собирање и транспортирање на отпадот, во која се планира обемот, динамиката, времето, начинот и технологијата на собирањето и транспортирањето на отпадот.

Програмата од став 1 на овој член ја донесува Советот на Град Скопје најдоцна до 15 декември во тековната година за наредната година.


IV. ФИНАНСИРАЊЕ
Член 35

Средствата за одржување на јавната чистота се остваруваат од:
- надоместокот за употреба на градежно земјиште во делот што отпаѓа за таа намена,
- цената на комуналната услуга,
- буџетот на Град Скопје и
- други средства утврдени со Закон.
Член 36

Средствата за собирање и транспортирање на комуналниот цврст и технолошки отпад се остваруваат од надоместокот што корисниците го плаќаат за извршената услуга.

V. НАДЗОР
Член 37

Надзор над примената на оваа одлука врши надлежниот градски орган.
Член 38

Инспекциски надзор над примената на Законот за одржување на јавната чистота, собирање и транспортирање на комуналниот цврст и технолошки отпад и оваа одлука вршат комуналните инспектори на Градот.

VI. КАЗНЕНИ ОДРЕДБИ
Член 39

За непочитување на оваа одлука ќе се применуваат казнените одредби определни во Законот за одржување на јавната чистота, собирање и транспортирање на комуналниот цврст и технолошки отпад.

VII. ПРЕОДНИ И ЗАВРШНИ ОДРЕДБИ
Член 40

Со влегувањето во сила на оваа одлука престанува да важи Одлуката за условите и начинот на одржување на комуналната хигиена на подрачјето на град Скопје ("Службен гласник на Град Скопје" бр.8/86, 6/88, 9/90, 2/94 и 7/95).